Блог турында
информбюро
Репортаж
Ата-аналарга
Яшь вебмастерга
Хәтергә
Укучылар иҗаты
Укытучыга
Укытучым
Авылдашлар
фотогалерея
Мәктәп музее
Ел укытучысы
АрхивтанБөтен җирне сарылыкка күмеп, табигатькә алтын көз килде. Көннәр салкыная һәм кыскара башладылар. Әле күптән түгел генә ямь-яшел булып утырган агачлар сары яфракларын моңсу гына җиргә коялар.
Тик шулай да яратам мин көз айларын. Ник дисезме? Чөнки көз җитү белән, бакчада язын утырткан, җәен су сибеп үстергән яшелчәләр өлгерә. Кояшлы матур көннәрдә ,яңгырга тидермичә җыеп алырга да кирәк бит әле аларны. Белгәнебезчә, бакчада көзен эш бик күп.
Иң беренче бәрәңге, суган, сарымсак уңышлары җыелып алына һәм кышка сакларга урнаштырыла. Кишер, чөгендер, кәбестә үз вакытларын көтеп, сабыр гына көзге кояшка кызыналар. Тиздән аларны җыеп алыр вакыт җитә инде.
Яшелчәләрдән бушаган урыннарны, чүп үләннәреннән арындырып, китмәнләп, язга әзерләп куярга кирәк. Шулай ук җиләк-җимеш агачларын да кышка әзерләү вакыты җитә. Алмагач кәүсәләрен агартып, карлыган, кура куакларын кар басып сындырмасын өчен бәйләп калдыру сорала. Шулай булганда гына, икенче ел уңышы да әйбәт булачак.
Валитов Адел.
Сентябрь, сентябрь
Килеп тә җитте,
Кунак түгел, хуҗа булып
Түрләргә үтте.
Аллы- гөлле букет кулларымда,
Остазыма бүләк итәргә.
Ә ул безгә мәңге шиңми торган
Гөл орлыгын бирер чәчәргә.
Ниһаять, үзенең алтын төсле яфраклары, моңсу яңгырлары белән сентябрь ае да килеп җитте. Сентябрь- безнең өчен көзнең беренче ае да, җиләк-җимешләргә, яшелчәләргә бай вакыт та. Шул ук вакытта сентябрь- уку елын башлаучы ай да. Барыбызга да мәгълүм булганча, 1 нче сентябрь – белем бәйрәме. Беренче сентябрь иртәсе кояшлы да, болытлы да, яңгырлы да була. Шулай да андый иртәләрнең һәрберсе күңелгә кояшлы булып иңә. Ничек шулай булмасын!? Белем иле юлыннан беренче адымнарын ясый бит балалар, киләчәкләренә юл яралар! Алар матур итеп киенгәннәр: кулларында портфель һәм чәчәкләр бәйләме. Күңелләрендә мәңге онытылмаслык бәйрәм. Ел саен бу көнне барлык мәктәп ишекләре укучылар өчен ачыла. Әлеге ишекләрнең ачылуын зарыгып көтеп алучы, беренче укытучылары белән танышучы – 1 нче сыйныф укучыларыннан күбрәк сөенүче кеше юктыр, мөгаен.
Ниһаять, бөтен дөньяны яшеллеккә күмеп, бәйрәмле май ае да килеп җитте. Бакчаларда алмагачлар хуш ис аңкыта. Җылы көннәр яңгырлар белән чиратлаша. Дөнья яши, дөнья балкый. Нәкъ менә шундый көннәрдә безнең Ватаныбыз сугышчылары 4 ел буена Туган җиребезне батырларча якладылар.
Сугыш никадәр кайгы-хәсрәт, югалту, бәхетсезлек китерде. Шушы елларда кешеләр генә түгел, табигать тә зур югалтуларга дучар булган: урманнар янган, кырлар, таулар тетрәнеп беткән.
Күпме сагыш, ялгызлык, толлык, ятимлек кебек афәтләрне китергән сугыш әле дә безнең йөрәкләрдә саклана.
Бөек Җиңүдән соң ярты гасырдан артык вакыт үтсә дә, безнең илдә Җиңү бәйрәмен һәр ел саен яратып каршылыйлар. Бу көнне күп кенә мәгариф йортларында, мәктәпләрдә ветераннар белән очрашулар үткәрелә. Алар хөрмәтенә зур бәйрәмнәр, шәһәр урамнарында парад үтә, ветераннарыбызны котлап бүләкләр тапшырыла.
Быел пандемиягә бәйле булганга безнең мәктәптә 9 май бәйрәменә багышланган төрле чаралар онлайн узды.
Без, яшьләр, сугыш афәтен, аның бөтен фаҗигасен язучыларыбызның әсәрләре аша, бабайларыбызның сөйләгәнен тыңлап кына күз алдына китерәбез. Алар хәзерге тыныч, матур тормыш өчен гомерләрен дә кызганмаганнар, һәм фронтта һәлак булган каһарманнарны онытмаска , яшәүнең кадерен белергә өндиләр.
Май аенда инде табигать тәмам уянып, яшәреп китте. Тик шул яшьлек, соклану хисләре белән бергә, безнең күңелләрдә кадер, сагышлану, хәтер кичерешләре дә үрелә. Хөрмәтле ветераннарыбыз! Рәхмәт Сезгә! Рәхмәт сезгә барлык эшләгәннәрегез өчен, рәхмәт Туган җиребезне, туфрагыбызны саклап калганыгыз өчен, дөньяның бөтен матурлыгын һәм яктылыгы без сезнең аркагызда күрә алабыз! Сезгә – Мәңгелек Дан җыры!
И Тукай! Бөтен дөньяга
Танылган синең даның,
Иң бөек һәм иң яраткан
Горурлыгы татарның.
Апрель ае барлык татар милләте өчен шатлыклы да, кайгылы да. Шатлыклы, чөнки бу ай безгә атаклы, бөек шәхесне – яраткан шагыйребез Габдулла Тукайны бүләк иткән. Ләкин шул ук айда ул, нибары 27 ел гына яшәп, вафат та була. Шагыйрьнең авыр, бормалы тормыш юлы, шул ук вакытта матур, барыбызга да аңлашырлык шигъри таланты турында һәрбер кеше беләдер. Г.Тукайның иҗаты зур һәм үзенчәлекле: ул төрле гәзитләрдә редактор, баштарак корректор да булып эшли, соңыннан Г.Камал белән берлектә “Яшен” дигән сатирик журнал чыгара, балалар өчен күп шигырьләр яза, төрле милләтнең төрле проблемаларын күтәрүче шигырьләр иҗат итә, шулай ук рус классикларының да күп әсәрләрен татар теленә тәрҗемә итү эше белән шөгыльләнә. Шагыйрьгә багышланган өч музей да бар: Кырлай, Казан һәм Кушлавыч та.
Яраткан шагыйребезнең тиз рәвештә тормыштан китүе – һәркем өчен аяныч хәл. Ләкин ул, 27 ел гына яшәсә дә, үзе артыннан бай мирас калдырды. Тукай – мәңгелек шагыйрь!
Яз башы – Яктылык язы. Без аны март аенда ук күзәтәбез. Бер карашка, урамнарда бернәрсә дә үзгәрмәгән кебек: шул ук кар, шул ук агачлар. Бары тик кояш кына күз камаштыргыч якты, аның нурлары астында эри башлаган карның бәллүр сыман ялтыравык аклыгы күзләрне авырттыра. Кар өстендә ачык күренеп торган күләгәләр бу вакытта аеруча матур: алар күк йөзеннән зәңгәр төскә, батып баручы кояштан аксыл шәмәхә төскә, җирдән – коңгырт-сары төскә керәләр.
Иртә язда һава үтә күренмәле, саф һәм салкын. Кояшлы көннәрдә күк йөзе зәп-зәңгәр. Анда тыгыз ак болытлар агыла. Әйтерсең күк йөзендә бозлар ага. Ул болытлар, чыннан да, боз кристаллчыкларыннан тора.
Тәүлекнең якты өлеше һаман арта бара, һәм, ниһаять, бөтен җирдә төн озынлыгы белән көн озынлыгы тигезләшә. Шуңа күрә 21 март язгы көн-төн тигезлеге көн дип йөртелә. Хәзер көн озынлыгы һаман арта барачак. Чын яктылык бәйрәме!
